يوم السبت أقام الملتقى التربوي العربي في مسرح البلد فعالية ”الإتجاه المشاكس“. وكانت هذه الفعالية حسب ما هم عرفوها ب “فرصة لنعبر عن استياءنا من المجتمع المدني بابداع وبطريقة ساخرة.. فرصة لطرح اتجاه معاكس لما هو موجود… طرح بديل حقيقي وغير مستهلك نشعر بأنه أكثر أهمية والحاحا وارتباطا بنا … وربما طرحه بطريقة تسخر من الموجود بابداع…بالكلام والصور والفيديو والمسرح.”

كانت الفقرات متنوعة, مسلية ومفيدة بطريقة فعلاً كانت ساخرة لكن كان الصراحة ناقصها شوية تنظيم. كان الحضور قليل, أنا كنت متوقعة يكون عدد المشاكسين بعمان أكتر شوي بس شكلو خيرها بغيرها. بما أنو الحضور كان أقل من المتوقع كان الموضوع بيتوتي أكتر وكأنو الكل هناك بيعرفوا بعض. المهم, وحدة من الفقرات كانت إعادة ترتيب, أو أحسن أحكي إنتاج أغنية كاملة على لحن “لشو التغيير” لشربل روحانا. تمنيت أنو يكون معي كاميرا فيديو بهديك اللحظة بس برضو خيرها بغيرها. حبيت أشارككم كلمات الأغنية اللي أتوقع كتبها حدا من شباب أو صبايا مسرح البلد

——

ياللي عم تدفع عالفاضي ومن أية دولة كنت
طمن بالك خد ملايينك وارجع من حيثُ جئت
هن المشاريع ذاتهن قصص النجاح ذاتهن
حتى التقارير ذاتهن لشو التمويل

ياللي عم تسهر بالمكتب وبتخطط للتجديد
عم بتألف شي بروبوزل فاتح له إكسل شيت
هن الأفكار ذاتهن والمقترحات ذاتهن
حتى النتائج ذاتهن لشو التمويل

ياللي عم تهلك بحالك رايح جايي عالفيلد
عالصحراوي طالع نازل عم تخترعوا شي جديد
مالحكي هو ذاته والبرنامج ذاته
جايي من برة ذاته لشو التمويل

ياللي عم تحضر هالورشة وبأية جلسة كنت
انه فكرك هيي الورشة بتنفعنا نحنا وإنت
هو المشارك ذاته والكوفي بريك ذاته
حتى المدرب ذاته لشو التمويل

آخر فكرة لولادي وأيضاً لولاد الناس ياللي حلمهم عم بيزهر, حلمهم عالعين والراس
انشالله التمويل جايي من إيدن هني جاية
رغماً عن حزني جايي انشالله التمويل

——

الموضوع واضح, التمويل. التمويل من الخارج, من ناس مفكرين حالهم أحسن منك, وانو انت بحاجة إلهم. شو رأيكم؟

Advertisements